កំពង់ស្ពឺ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត ថាលោកស្រកទម្ងន់អស់ ១,៥គីឡូក្រាម បន្ទាប់ពីទៅចូលរួមកិច្ចប្រជុំកំពូលអាស៊ាននៅទីក្រុងហ្សាកាតាប្រទេសឥណ្ឌូនេស៊ី។ សម្ដេចថា ការងារក្នុងកិច្ចប្រជុំអាស៊ានសម្ដេចស្ទើតែគ្មានពេលទំនេរដើម្បីសម្រាកនោះទេ។
ថ្លែងនៅក្នុងជំនួបជាមួយនឹងកម្មករជិត ២ម៉ឺននាក់នៅក្នុង ស្រុកសំរោងទង ខេត្តកំពង់ស្ពឺ សម្ដេចធិបតី ហ៊ុន ម៉ាណែត បានលើកឡើងថា ការទៅប្រជុំអាស៊ានមិនមែនដើម្បីតែរូបភាពល្អមើលនោះទេ សម្ដេចមានការងារជាច្រើនទាំងជំនួបក្នុងក្របខណ្ឌអាស៊ាននិងជំនួបទ្វេភាគីជាមួយនឹងប្រទេសជាមិត្ត។
សម្ដេចថា៖ «អញ្ចឹងបានសួរថាតើ ហ៊ុន ម៉ាណែត ទៅហ្នឹងបានធ្វើអីមេដឹកនាំប្រទេសមួយៗទៅប្រជុំធ្វើអី? សម្ដេចតេជោទៅប្រជុំធ្វើអី? ទៅតែគ្រាន់បង្ហាញរូបភាពស្លៀកពាក់ស្អាត! ចូលរួមថតរូប។ មិនមែនទេ! នេះគឺគ្រាន់តែជាការងារបន្ទាប់បន្សំប៉ុណ្ណោះ»។
សម្ដេចថា ការងារនៅទីក្រុងហ្សាកាតា ប្រទេសឥណ្ឌូនេស៊ី គឺសូម្បីតែ ១០នាទីក៏ត្រូវតែច្នៃឲ្យមានពេលជួបពិភាក្សាផងដែរ។
សម្ដេចថាសម្ដេចស្រក់ទម្ងន់អស់មួយគីឡូកន្លះក្នុងរយៈពេល ៤ថ្ងៃដែលបានអញ្ជើញទៅចូលរួមកិច្ចប្រជុំកំពូលអាស៊ាននេះ។
បើតាមសម្ដេចការងារនេះសម្ដេចធ្វើដើម្បីប្រទេសជាតិដែលមានការងារធំបីដែលសម្ដេចធ្វើរួមមានការងារការទូត ការជួបទ្វេរភាគី និងការងារនយោបាយបញ្ជាក់ពីជំហររបស់កម្ពុជា៕
